თიბისი გალერეაში გაიმართა წიგნის „საკრალური ფერი“ პრეზენტაცია, რომელიც ეძღვნება ცნობილ ქართველ მსახიობს, ნანა ყიფიანს.

წიგნში თავმოყრილია ნანა ყიფიანის ფოტოები გადაღებული ცნობილი ქართველი ფოტოგრაფების, ირინა აბჟანდაძის, გურამ წიბახაშვილის, იური მეჩითოვის მიერ; ასევე ცნობილი მხატვრების ედმოდ კალანდაძის, ელეონორა შაბლოვსკაიას და სხვების მიერ შექმნილი პორტრეტები, ნანა ყიფიანისათვის მიძღვნილი ლექსები და მოგონებები დაკავშირებული მსახიობის შემოქმედებასა და ცხოვრებასთან.
 
წიგნის ავტორია ბელა სურგულაძე.

თიბისი გალერეაში უძველესი ტექნოლოგიით, მზის სხივების ზემოქმედებით დაბეჭდილი ფოტოების გამოფენა გაიმართა. „SUN PRINT” - ასე ჰქვია პროექტს, რომელიც ფოტოგრაფმა მინდია მინდელაშვილმა თიბისი ბანკთან ერთად განახორციელა.

გამოფენაზე 45 უნიკალური ფოტო იყო წარმოდგენილი, რომელიც დაიბეჭდა 1842 წელს, მეცნიერ სერ ჯონ ჰერშელის მიერ აღმოჩენილი ტექნოლოგიით - მზის სხივების ზემოქმედებით. მოგეხსენებათ, ფოტოების ბეჭდვა ხდება სიბნელეში. ამ გამოფენაზე წარმოდგენილი ნამუშევრები კი იმით არის უნიკალური, რომ ისინი დაბეჭდილია მზის სხივების ზემოქმედებით და იძლევა ლურჯ გამოსახულებას, გრაფიკული ნამუშევრის ეფექტს, ფოტოების დაფერვის საუკეთესო საშუალებაა შავი ჩაი. თავდაპირველად იბეჭდება ნეგატივი, იფერება ქაღალდი სხვადასხვა ფორმის ლაქებით და შემდეგ მზის სხივების ზემოქმედების შედეგად კეთდება სრულიად არაჩვეულებრივი, გრაფიკული ნამუშევრის მსგავსი ფოტო....  

ამ ტექნოლიგიით დაბეჭდილი ფოტოების გამოფენა საქართველოში პირველად, თიბისი გალერეაში გაიმართა.

თიბისი გალერეაში ქართველი ჟურნალისტისა და მეცნიერის იური ვაჩნაძის წიგნის „ქართულ-რუსული კონტრაპუნქტი“ პრეზენტაცია გაიმართა.

წიგნში ორ ენაზე, ქართულად და რუსულად, ქრონოლოგიურად არის აღწერილი ახალგაზრდა ქართული სახელმწიფოს ყველა სფეროში მომხდარი მნიშველოვანი მოვლენები, მათ შორის რუსეთთან ურთიერთობის კუთხით. წიგნს თან ერთვის კომპაქტ-დისკი იური ვაჩნაძის მხატვრული რადიოგადაცემებით, რომლებიც სხვადასხვა დროს გადაიცემოდა ამერიკული რადიოსადგურის „სვობოდა“ ეთერით. წიგნის შეძენა დღეიდან წიგნის მაღაზიებში შეგიძლიათ.  

მსოფლიოში ცნობილი ქართველი პიანისტი, მრავალი საერთაშორისო ჯილდოსა და პრემიის მფლობელი, პიანისტი ეთერ ანჯაფარიძე თიბისი გალერეაში ქართველ მსმენელს შეხვდა. აქვე შედგა მისი ახალი ალბომის “Live at Round Top” პრეზენტაცია და მცირე კონცერტი.  

ალბომში  შესულია სერგეი რახმანინოვის მე-4 საფორტეპიანო კონცერტი და გია ყანჩელის ვალს-ბოსტონი, რომელიც პიანისტმა ცოტა ხნის წინ ტეხასის საერთაშორისო საფორტეპიანო ფესტივალზე შეასრულა.

ეთერ ანჯაფარიძე აღიარებულია, როგორც თანამედროვეობის  ერთერთი ყველაზე მრავალმხრივი და ღრმა მუსიკოსი; ასრულებს კონცერტებს მსოფლიოს წამყვან ორკესტრებსა და დირიჟორებთან, პლანეტის ყველაზე პრესტიჟულ საკონცერტო სცენებზე.  მისი დისკოგრაფია მოიცავს გრემისა და დოიჩე შალპლატენის ჯილდოების ნომინაციებზე წარდგენილ სოლო ალბომებს.   

ეთერ ანჯაფარიძე მართავს მასტერკლასებს  მსოფლიოს სხვადასხვა კუთხეში. იგი არის უნიკალური საფორტეპიანო სასწავლო მოდელის, მაღალპროფესიული დაოსტატების პროგრამის „ამირკლავირ“ დამფუძნებელი. ამჯამად ეთერ ანჯაფაპირძე ნიუ იორკის უნივერსიტეტის საფორტეპიანო კატედრის პროფესორია.

აუტიზმის საერთაშორისო დღესთან დაკავშირებით, თიბისი გალერეაში ინკლუზიური გამოფენა გაიმართა. ამ დღის აღსანიშნავად „საქართველოს აუტიზმის ასოციაციამ“ და ილიას უნივერსიტეტმა აუტისტური სპექტრის აშლილობის მქონე ბავშვთა და უნივერსიტეტის ხელოვნების ცენტრის მოსწავლეთა ნამუშევრები წარმოადგინეს. 

თიბისი გალერეაში იაპონელი ქართველოლოგის, ჰიროკატე მაედას წიგნის,  „ქართველები სეფიანთა ირანში“ პრეზენტაცია გაიმართა.

ნარკვევში მოცემულია ოთხი ქართული გვარის – ბარათაშვილების, სააკაძეების, უნდილაძეებისა და მირიმანიძეთა ცხოვრება და საქმიანობა სეფიანთა კარზე. 

ნაშრომში წარმოდგენილია საქართველოს ისტორიისათვის უაღრესად საინტერესო ახალი მასალები
და დასკვნები, რომლებიც ახალგაზრდა მეცნიერმა რამდენიმეწლიანი კვლევის შედეგად მიიღო.

პრეზენტაცია იაპონიის კულტურის თვის- “იაპონიის გაზაფხული “ ფარგლებში გაიმართა.

თიბისი გალერეამ ცნობილი იტალიელი საქსაფონისტის, ფედერიკო მონდელჩის კონცერტს უმასპინძლა. კონცერტში მონაწილეობას იღებდა საქართველოს სახელმწიფო სიმფონიური ორკესტრის სიმებიანი ჯგუფი, ნიკოლოზ რაჭველის ხელმძღვანელობით.

ფედერიკო მონდელჩი თავისი დროის წამყვან საქსაფონისტადაა აღიარებული. როგორც სოლისტი ის გამოდის მსოფლიოს მრავალ წამყვან ორკესტრთან. კომპოზიტორებმა მას მრავალი ნაწარმოები მიუძღვნეს, რომელთაც მონდელჩიმ საერთაშორისო აღიარება მოუტანა.

ფედერიკო მონდელჩი ფართო აუდიტორიის წინაშე გამოდის არა მარტო როგორც სოლისტი, არამედ როგორც დირიჟორიც. ის თანამედროვე მუსიკის აქტიური პროპაგანდისტია და შესრულების ტექნიკის თვალსაზრისით ინოვატორ შემსრულებლად ითვლება.

თიბისი გალერეაში მონდელჩიმ იტალიური მუსიკის შედევრები, ნინო როტას, ენიო მორიკონეს, ნიკოლა პიოვანის ნაწარმოებები შეასრულა. კონცერტს თიბისი ბანკის ერთგული და ლოიალური კლიენტები ესწრებოდნენ.    

თიბისი გალერეაში ქართველი კინორეჟისორისა და მთარგმნელის, ლანა ღოღობერიძის ახალი  წიგნის, „ფრანგული პოეზია“ პრეზენტაცია გაიმართა.  შარლ ბოდლერი, პოლ ვალერი, პოლ ვერლენი, გიიომ აპოლინერი, პოლ ელუარი, ჟაკ პრევერი... – ფრანგული პოეზიის შედევრები თიბისი გალერეაში თავად მთარგმნელმა წაიკითხა.

თიბისი გალერეაში ლაშა ბუღაძის ახალი წიგნის „ნავიგატორი“ პრეზენტაცია გაიმართა. პიესა 2011 წლის, BBC-ის რადიოპიესების მსოფლიო კონკურსის გაიმარჯვებულია.

„ნავიგატორი“ ტრაგი-კომედიაა, რომელიც ადამიანის გაუცხოებასა და მარტოობაზე მოგვითხრობს. რადიოპიესის ფორმით დაწერილ დრამაში სიუჟეტი დინამიურად ვითარდება და ღრმა შთაბეჭდილებას ტოვებს მკითხველზე. თიბისი გალერეაში მოსულ სტუმრებს საკუთარი პიესიდან ამონარიდები თავად ავტორმა წაუკითხა.

წიგნი ბაკურ სულაკაურის გამომცემლობამ გამოსცა.

31 იანვარი 2012

 თიბისი ბანკის ვიპ სამსახურის ინიციატივითა და ორგანიზებით, თიბისი გალერეაში ქართველი ჯაზ შემსრულებლის, პიანისტისა და კომპოზიტორის, დინი ვირსალაძის კონცერტი გაიმართა.

პიანისტს აკომპანიმენტს უწევდნენ ლევან დეისაძე (ბასი) და ზაზა ცერცვაძე (დასარტყამი ინსტრუმენტი).

დინი ვირსალაძე ერთ-ერთი პირველი ქართველი ჯაზ-პიანისტია. ცნობილია შესრულების უნიკალური, დახვეწილი ტექნიკით, მელოდიურობით, იმპროვიზაციის საოცარი უნარითა და მდიდარი ჰარმონიით.

1990 წლიდან იყო თბილისის კამერული ორკესტრის სოლისტი. როგორც ჯაზ-პიანისტი და კომპოზიტორი, ფართო აუდიტორიის წინაშე პირველად 1993 წელს წარსდგა.  ამავე წელს მონაწილეობა მიიღო ნოვოსიბირსკის ჯაზ-ფესტივალში, რამაც მნიშვნელოვნად შეცვალა მისი როგორც მუსიკოსის ცხოვრება.

დინი ვირსალაძეს სხვადასხვა დროს მიღებული აქვს არაერთი ჯილდო, საერთაშორისო აღიარება და პრიზი. 1996 წელს ფესტივალზე „მარგარიტა“ მუსიკოსმა ნომინაციაში „საუკეთესო ჯაზ-პიანისტი“ გაიმარჯვა. 2003 წლიდან დინი ვირსალაძე თანამშრომლობს თბილისის ბიგ-ბენდთან, რომელიც 2006 წელს მონტე კარლოს ფესტივალზე „საუკეთესო ბიგ-ბენდად“ აღიარეს.

კონცერტს თიბისი გალერეაში თიბისი ბანკის ლოიალური და ერთგული კლიენტები და ჯაზ მუსიკის მოყვარულები ესწრებოდნენ.

30 იანვარი, 2012

თიბისი გალერეაში ცნობილი ქართველი ავანგარდისტი მხატვრის, კარლო კაჭარავას ნამუშევრების გამოფენა გაიხსნა.  გამოფენაზე წარმოდგენილი იყო ნამუშევრები კარლო კაჭარავას ოჯახის კოლექციიდან, მათ შორის ნახატები, რომლებიც ფართო საზოგადოებას არასდროს უნახავს.  

პირველად ქართველ დამთვალიერებელს საშუალება მიეცა, ენახა კარლო კაჭარავას ბოლო, დაუმთავრებელი ნამუშევარი  „სიბნელის ხელოვნება“, რომელსაც მხატვარი 11 დღის განმავლობაში, სანთლის შუქზე ხატავდა. სწორედ ამ ნახატზე მუშაობისას 1994 წლის, 9 აპრილს, 30 წლის ასაკში, ის ანევრიზმით გარდაიცვალა. „სიბნელის ხელოვნება“ მხატვრის ერთ-ერთი ყველაზე გამორჩეული, ორიგინალური და ექსპრესიული ნამუშევარია.  

კარლო კაჭარავა ქართველი ავანგარდისტი მხატვრების უმცროს თაობას განეკუთვნება. ის იყო ერთ-ერთი პირველი ქართველი მხატვარი, რომელმაც საქართველოში ალტერნატიულ ხელოვნებას ჩაუყარა საფუძველი. მან დატოვა 1000-მდე ფერწერული ტილო და 3000-მდე გრაფიკული ნამუშევარი, რომელთაგან თითოეული, საოცარი ორიგინალობითა და ინდივიდუალიზმით ხასიათდება. კარლო კაჭარავას ნახატები ინახება ვენის, ვარშავისა და ამერიკის თანამედროვე ხელოვნების მუზეუმებში.  

გამოფენის პარალელურად, თიბისი გალერეაში შედგა პროექტის „ქართული მხატვრობა“ მეოთხე წიგნის „კარლო კაჭარავა“ პრეზენტაცია.

პროექტი „ქართული მხატვრობა“ ყველა დროის გამოჩენილი ქართველი მხატვრების ალბომების სერიის გამოცემას გულისხმობს და ქარჩხაძის გამომცემლობის მიერ, თიბისი ბანკსა და ჟურნალ „ტაბულასთან“ ერთად ხორციელდება.  

პროექტის ფარგლებში თიბისი გალერეაში უკვე შედგა ქართველი მხატვრების, ავთო ვარაზის, გიგო გაბაშვილისა და ელენე ახვლედიანის პერსონალური გამოფენები და  ალბომების პრეზენტაციები. თიბისი გალერეა გააგრძელებს გამოფენათა ციკლს და ყოველი ახალი ალბომის კვალდაკვალ, ყოველთვიურად შედგება ცნობილი ქართველი მხატვრების გამოფენები.   

თიბისი გალერეაში ტრიო "სიმის" შემოქმედებითი საღამო გაიმართა. შედგა ორი ვიდეო-კლიპის პრეზენტაცია და რამდენიმე სიმღერის პრემიერა.

გალერეაში მოსულ სტუმრებს საშუალება ჰქონდათ, ენახათ ვიდეო-კლიპები სიმღერებზე "ქუთაისი" და "ლოთები". მათ შორის ერთ-ერთი თოჯინური კლიპია, რომლის პრემიერაც თიბისი გალერეაში შედგა.

ტრიო "სიმის" ახალ, საიუბილეო დისკში შესულია როგორც ძველი და ცნობილი სიმღერები, ასევე რამდენიმე ახალი სიმღერაც, რომელიც ახალგაზრდა კომპოზიტორებს ეკუთვნით. დისკის საშუალებით ტრიო "სიმის" მსმენელი ნატო გელაშვილის, მაცაცო სებისკვერაძის, მარიკა კვალიაშვილის, ოთარ რამიშვილის სიმღერებს მოისმენს. დისკში ასევე შესულია კომპოზიტორ ბიჭიკო ზაქარიაშვილის ახალი სიმღერა.

სპეციალურად თიბისი ბანკის ლოიალური მომხმარებლისათვის, თიბისი გალერეაში ნიუ-იორკის ჯულიარდის კონსერვატორიის ვარსკვლავის, პიანისტ დავით ალადაშვილის კონცერტი გაიმართა. მოწვეული სტუმრის სტატუსით კონცერტზე შვეიცარიაში მოღვაწე ქართველმა პიანისტმა, თეა ჭკუასელმაც დაუკრა.

დავით ალადაშვილმა ქართველი მსმენელისათვის შუმანისა და შოპენის ნაწარმოებები შეასრულა, ასევე შესრულდა რამდენიმე ფრაგმენტი ჩაიკოვსკის ბალეტიდან "მაკნატუნა". თეა ჭუკუასელთან ერთად კი პიანისტმა მოცარტის რე მაჟორული პიესა შეასრულა ოთხი ხელისათვის. 

კონცერტს თიბისი ბანკის სამეთვალყურეო საბჭოს წევრები, მენეჯმენტის წარმომადგენლები, საქართველოს პირველი ლედი, სანდრა რულოვსი, ამერიკის ელჩი, ჯონ ბასი და სხვა მოწვეული სტუმრები ესწრებოდნენ.

დავით ალადაშვილი ჯულიარდის სკოლის ერთ-ერთი ყველაზე წარმატებული სტუდენტია, ის არის ვან კლიბერნისა და სუზან როუზის საფორტეპიანო გრანტის მფლობელი, საქართველოს პრეზიდენტის ორგზის სტიპენდიანტი, ვლადიმერ სპივაკოვის ფესტივალის ლაურეატი (მოსკოვი), ნიკოლაი რუბინშტეინის კონკურსის გრან-პრის მფლობელი (პარიზი). 

დავით ალადაშვილის პირველი პროფესიული გამოსვლები მსოფლიოს ყველაზე პრესტიჟულ სცენებზე შედგა. 2010 წელს მან კარნეგი ჰოლში პირველი სოლო კონცერტი ჩაატარა, სადაც შოპენისა და შუმანის ნაწარმოებები შეასრულა. ახალგაზრდა პიანისტი უკვე მოექცა მსოფლიო მუსიკალური საზოგადოების ყურადღების ცენტრში, მასზე იწერება სტატიები სხვადასხვა წამყვან გამოცემებში, ალადაშვილს უწოდებენ "უნივერსალურ პიანისტს, რომელსაც მსოფლიოს უდიდესი დარბაზების მოჯადოება შეუძლია".

თიბისი გალერეაში, სპეციალურად თიბისი ბანკის თანამშრომლებისათვის კახი კავსაძის შემოქმედებითი საღამო და ნანა ჯანელიძის მხატვრულ-დოკუმენტური ფილმის „ნეტავ იქ თეატრი არის?!“ ჩვენება გაიმართა. ფილმის დასრულების შემდეგ, თიბისი ბანკის საგამოფენო სივრცეში შეკრებილ საზოგადოებას კახი კავსაძესთან შეხვედრისა და მისგან ავტოგრაფების მიღების საშუალებაც მიეცათ.

ფილმი „ნეტავ იქ თეატრი არის?!“ კახი კავსაძისა და მისი ცხოვრების შესახებ მოგვითხრობს. მთხრობელიცა და მთავარი გმირიც თავად არტისტია, რომელიც ფილმში საკუთარი ბავშვობისა და ცხოვრების ყველაზე დრამატულ ეპიზოდებზე ჰყვება, თხრობას ფონად მიჰყვება საქართველოს უახლესი ისტორიის ამსახველი რეალური კადრები, მხატვრული სცენები დაკავშირებული კახი კავსაძის ბავშვობასთან. ნანა ჯანელიძის ამ უკანასკნელმა ნამუშევარმა უკვე არაერთი ჯილდო აიღო საერთაშორისო კონკურსებსა და ფესტივალებზე ნომინაციებში „საუკეთესო დოკუემენტური ფილმი“. უახლოეს მომავალში კი ფილმის ჩვენება ბერლინალეზეც იგეგმება.

სპეციალურად თიბისი ბანკის ერთგული და ლოიალური მომხმარებლისათვის, თიბისი გალერეაში კომპოზიტორ გურამ ბზვანელის შემოქმედებითი საღამო გაიმართა.  

საღამოზე შედგა კომპოზიტორის ალბომის პრეზენტაცია და კონცერტი. გურამ ბზვანელის სიმღერები შეასრულეს ცნობილმა ქართველმა მომღერლებმა, ლიზა ბაგრატიონმა და ნატო მეტონიძემ. კომპოზიტორის მეგობრებმა და „პოლიტექნიკური ინსტიტუტის კვარტეტის“ ყოფილმა წევრებმა გურამ ბზვანელთან და მის შემოქმედებასთან დაკავშირებული ისტორიები გაიხსენეს.

ალბომში შესულია კომპოზიტორის ცნობილი და ყველასათვის საყვარელი სიმღერები, მათ შორის „ჩავაქრე სანთელი“, „ვედრება“, „ასე მგონია“ „ძველებური თბილისური“ და სხვები. ამავე ალბომში შესულია „პოლიტექნიკური ინსტიტუტის კვარტეტის“ სიმღერები, რომლებითაც 50-იან წლებში გურამ ბზავანელმა თავისი შემოქმედებითი მოღვაწეობა დაიწყო.   

გურამ ბზვანელმა „საქართველოს პოლიტექნიკური ინსტიტუტის კვარტეტი“ ზუსტად 50 წლის წინ დააარსა. (შოთა ხარაბაძე, გურამ ბაკურაძე, თამაზ ცინცაძე, გურამ ბზვანელი). კვარტეტის პირველივე გამოსვლებს მოჰყვა არაჩვეულებრივი პოპულარობა არა მხოლოდ საქართველოში, არამედ მის ფარგლებს გარეთაც... კვარტეტის წევრები გადაიღეს რუსულ ფილმში „გოგონა გიტარით“. ბზვანელის პირველი ყველაზე ცნობილი კომპოზიცია, რომელიც მან 17 წლის ასაკში დაწერა, იყო იოსებ გრიშაშვილის ლექსზე „ყურთბალიში“ შექმნილი სიმღერა,  რომელსაც შემდგომში „ჩავაქრე სანთელი“ ეწოდა. სწორედ ამ სიმღერით შედგა ცნობილი ქართველი მომღერლის, ნანი ბრეგვაძის საშემსრულებლო დებიუტიც.   

გურამ ბზავანელი და მისი შემოქმედება დღესაც არანაკლები პოპულარობით სარგებლობს, მის სიმღერებს ასრულებენ ისეთი ცნობილი მომღერლები როგორებიც არიან ნანი ბრეგვაძე, თამრიკო ჭოხონელიძე, თემურ წიკლაური, ეკა მამალაძე და სხვები.

თიბისი გალერეაში კლასიკოსი ქართველი მწერლის, გურამ დოჩანაშვილის ახალი წიგნის „ნაწარმოებთა სრული კრებულის“ მეშვიდე ტომის პრეზენტაცია გაიმართა, რომლის საშუალებითაც დოჩანაშვილის, როგორც პოეტის, ერთგვარი დებიუტიც შედგა.  

წიგნში შესულია ერთადერთი პოეტური ნაწარმოები, სახელწოდებით „მოწყალებანი“, რომელიც გურამ დოჩანაშვილმა დაახლოებით 40 წლის წინ შექმნა და რომელიც არასოდეს გამოქვეყნებულა. შესაბამისად მკითხველს მისი წაკითხვის საშუალება პირველად მიეცემა.  

გარდა მხატვრული ნაწილისა, ამ გამოცემაში შესულია  გურამ დოჩანაშვილის მიერ სხვადასხვა დროსა და შემოქმედებით ეტაპზე დაწერილი წერილები, ჩანაწერები, საუბრები ლიტერატორებთან, (მათ შორის ინტერვიუ ნიკო ჭავჭავაძესთან, გიორგი შატბერაშვილთან, იოსებ ნონეშვილთან და ა.შ). ამავე ტომში მკითხველი ნახავს გურამ დოჩანაშვილის ბოლოდროინდელ პროზაულ ნაწარმოებს „არის და იყოც უცნაური, ადამიანიც, წუთისოფელიც“, რომელიც მწერალმა დაახლოებით სამი წლის წინ, ცალკე წიგნად გამოაქვეყნა.  

გურამ დოჩანაშვილის „ნაწარმოებთა სრული კრებული“ გამომცემლობა „მერიდიანმა“ გამოსცა. პრეზენტაციაზე მოსულ სტუმრებს წიგნის შეძენის, გურამ დოჩანაშვილთან შეხვედრისა და მისგან ავტოგრაფის მიღების საშუალებაც ჰქონდათ.    

თიბისი გალერეაში გიგო გაბაშვილის ნამუშევრების გამოფენა გაიხსნა და შედგა პროექტის „ქართული მხატვრობა“ მეორე წიგნის „გიგო გაბაშვილი“ პრეზენტაცია.

გამოფენაზე წარმოდგენილი იყო გიგო გაბაშვილის ისეთი ცნობილი ნამუშევრები როგორებიცაა სამარყანდელი მოლა, ავტოპორტრეტი, ნატურმორტი ხილით, ბატალური სცენა და ა.შ. ნამუშევრების უმეტესობა კერძო კოლექციებში იყო დაცული, ნაწილი კი თიბისი ბანკში ინახებოდა.

თიბისი გალერეაში ცნობილი ქართველი ფერმწერის ექსპოზიცია მის დაბადების დღეს დაემთხვა - გიგო გაბაშვილი 21 ნოემბერსაა დაბადებული. მომავალი წელი კი მხატვრისთვის საიუბილეოა: 2012 წელს გიგო გაბაშვილის 150 წლის იუბილე აღინიშნება.

თიბისი გალერეაში მოსულ დამთვალიერებელს გამოფენის ნახვის საშუალება 6 დღის განმავლობაში ექნება.  

პროექტი „ქართული მხატვრობა“, რომელიც გულისხმობს ყველა დროის გამოჩენილი ქართველი მხატვრების ალბომების სერიის გამოცემას, ხორციელდება ქარჩხაძის გამომცემლობის მიერ, თიბისი ბანკსა და ჟურნალ „ტაბულასთან“ ერთად.

პროექტის ფარგლებში თიბისი გალერეაში უკვე შედგა ქართველი ფერმწერის, ავთო ვარაზის პერსონალური გამოფენა და პირველი ალბომის „ავთო ვარაზი“ პრეზენტაცია. თიბისი გალერეა გააგრძელებს გამოფენათა ციკლს და ყოველი ახალი ალბომის კვალდაკვალ, ყოველთვიურად შედგება ცნობილი ქართველი მხატვრების გამოფენები.

ჯაზ-ფესტივალის დაწყებამდე ერთი დღით ადრე „თიბისი სტატუსის“ ინიციატივით, თიბისი გალერეაში გრემის მფლობელი ვირტუოზი დრამერის, სონი ემორის  ექსკლუზიური მასტერკლასი გაიმართა.

პირველად ქართველ ჯაზ-შემსრულებლებს, საშუალება მიეცათ, გაცნობოდნენ მსოფლიო ჯაზის ვარსკვლავის, სონი ემორის შესრულების ტექნიკას და მიეღოთ რჩევები უმაღლესი კლასის მუსიკოსისგან.

სონი ემორი ცნობილია, როგორც “დრამერი მხოლოდ ვარსკვლავებისათვის“; 20-წლიანი მუსიკალური კარიერის განმავლობაში უკრავდა ისეთ ლეგენდარულ მუსიკოსებთან და ჯგუფებთან როგორებიც არიან: Earth, Wind and Fire, Joe Sample (ჯო სემპლი), The Crusaders, Bette Midler (ბეტ მიდლერი), Jennifer Lopez (ჯენიფერ ლოპესი), Stanley Clarke (სტენლი კლარკი), David Sanborn (დევიდ სენბორნი), Al Jarreau (ელ ჯერო) ... 

სონი ემორის მასტერკლასებზე დასწრება საკმაოდ ძვირადღირებული სიამოვნებაა უცხოეთში. მასტერკლასი ქართველი დრამერებისა და ჯაზ-შემსრულებლებისთვის, თბილისის ჯაზ-ფესტივალის გენერალურმა სპონსორმა „თიბისის სტატუსმა“ დააფინანსა.

24 ოქტომბერს თიბისი გალერეაში ცნობილი ქართველი ფერმწერის, ავთო ვარაზის ნამუშევრების გამოფენა გაიხსნა. კერძო კოლექციებში დაცულ, ვარაზის ცნობილ ტილოებს, ხანგრძლივი პაუზის შემდეგ, თიბისი ბანკმა თავი მოუყარა და ქართულ საზოგადოებას მისი დათვალიერების საშუალება მისცა.

თიბისი გალერეაში გამოფენილი იყო მხატვრის უნიკალური, გამორჩეული ტილოები, რომლებიც მან სხვადასხვა დროსა და  შემოქმედებით ეტაპზე შექმნა - პოპ-არტი “ჟიტანი“, „ბუკინისტის პორტრეტი“, „ნატურმორტი სურით და წიგნებით“, „ვიოლინო“, „ქრისტე“, „ქალიშვილი სავარძელში“ და ა.შ.  

ექპოზიციასთან ერთად მოეწყო ავთო ვარაზის ალბომის პრეზენტაციაც, რომელიც ქარჩხაძის გამომცემლობამ გამოსცა. ამით დაიწყო პროექტი „ქართული მხატვრობა“, რომლის ფარგლებშიც ყოველთვიურად გამოიცემა საუკეთესო ქართველი მხატვრების თითო ალბომი - მე-19 საუკუნიდან თანამედროვეობამდე. ალბომების პრეზენტაციასთან ერთად, თიბისი გალერეა წარმოადგენს ალბომში შესული მხატვრების ექსკლუზიურ გამოფენას.

პროექტს „ქარჩხაძის გამომცემლობა“ თიბისი ბანკსა და ჟურნალ “ტაბულასთან” ერთად ახორციელებს. ავთო ვარაზის შემდეგ, წლის ბოლომდე, თიბისი გალერეა გიგო გაბაშვილის და ელენე ახვლედიანის ალბომების პრეზენტაციას და გამოფენებს უმასპინძლებს...

თიბისი ბანკის ორგანიზებით, თიბისი გალერეაში ბიძინა კვერნაძის წიგნის „ხანდაზმული ვარ, ხან არა“... პრეზენტაცია გაიმართა. წიგნი სანდრო ყანჩელმა შეადგინა, ხოლო ილუსტრაციების ავტორი რეზო გაბრიაძეა.

„ხანდაზმული ვარ, ხან არა“... ერთგვარი მოგონებათა კრებულია, რომელშიც თავმოყრილია ეპიზოდები, იუმორისტული ფრაგმენტები და ისტორიები ბიძინა კვერნაძის ცხოვრებიდან. წიგნის ამ სახით გამოცემის იდეა თავად სანდრო ყანჩელს ეკუთვნის. ავტორმა მასალის შეკრება კომპოზიტორის ოჯახისა და მისი უახლოესი წრის დახმარებით შეძლო.

პრეზენტაციის შემდეგ თიბისი გალერეაში მისულ სტუმრებს საშუალება მიეცათ ენახათ ერთ-ერთი ბოლო, საზოგადოებისთვის უცნობი ვიდეო-ჩანაწერი, ინტერვიუ ბიძინა კვერნაძესთან, რომელიც რამდენიმე წლის წინ კომპოზიტორის შვილიშვილმა ჩაწერა.

გარდა ამისა, შედგა მცირე კონცერტიც.  ნანი ბრეგვაძემ ცნობილი „ვარდები არ არიან...“ შეასრულა, ინსტრუმენტული ნომრები კი ბიძინა კვერნაძის მოსწავლემ, ნიკა ნიკვაშვილმა წარმოადგინა. ბიძინა კვერნაძე გაიხსენეს მისმა მეგობრებმა გურამ მელივამ და გია ყანჩელმა. საღამოს თიბისი გალერეაში კომპოზიტორის ოჯახის წევრები, კოლეგები და მისი შემოქმედების თაყვანისმცემლები ესწრებოდნენ.

თიბისი ბანკის ორგანიზებით, თიბისი გალერეაში შედგა ახალგაზრდა პოეტის მიხეილ ტყებუჩავას, იგივე „მებაღის“ ოთხი პოეტური კრებულის პრეზენტაცია:

• პოემები
• წამის ათასწლეული
• ბედნიერება აქვეა
• მოლბერტის კლავიატურა

მიხეილ ტყებუჩავა დაიბადა 1984 წელს, ქალაქ თბილისში. სწავლობდა თბილისის ივანე ჯავახიშვილის სახელმწიფო უნივერსიტეტში, დიპლომატიისა და საერთაშორისო ურთიერთობების ფაკულტეტზე. 2000 წელს დაამთავრა ოქსფორდის საზაფხულო სკოლა. არის 5 წიგნისა და 6 პოემის ავტორი, მათ შორისაა ათას სტროფიანი პოემა „წამის ათასწლეულიც“, რომელიც მისი ერთ-ერთი ბოლო ნამუშევარია. გადაღებული აქვს რამდენიმე  მოკლემეტრაჟიანი ფილმიც:  „პოეზიის ბაღი“, „კინოპოეზია“ , „პოეზიის ტაძარი“...

„მებაღე“ მიხეილ ტყებუჩავას  ფსევდონიმია. „მარტო ვარ, მაგრამ მთელი სამყარო ჩემია. არსად ვარ, მაგრამ ყველგან ვარ... ხან არქეოლოგი ვარ, ხან მონადირე, ხანაც უბრალო მებაღე დედამიწისა...“ წერს პოეტი საკუთარ ჩანაწერებში...

წიგნების პრეზენტაციის შემდეგ მიხეილ ტყებუჩავას მეგობრები წაიკითხავენ ფრაგმენტებს ახალგაზრდა პოეტის შემოქმედებიდან.

14 ივლისს  გალერეაში თეა ჭკუასელის (ფორტეპიანო), გიორგი ჯორჯაძისა (ვიოლონჩელო) და ლელა მჭედლიძის (ვიოლინო) მონაწილეობით კამერული მუსიკის კონცერტი შედგა. 

10 ივნისს თიბისი გალერეამ ქართველი ფოტოგრაფის ალექსანდრე სააკოვის დღემდე უცნობი ნამუშევრების გამოფენას უმასპინძლა.

3 ივნისს, ევგენი მიქელაძის სახელობის მეორე ცენტრალური მუსიკალური სასწავლებლის მოსწავლეთა კლასიკური ჯაზის კონცერტი გაიმართა.

28 მაისს, საქართველოს პირველი ლედის, სანდრა რულოვსის ინიციატივით,  მხატვარ პაატა ყუფარაძის ნამუშევრების გამოფენა „ფერთა ზეიმი“ გაიმართა.

17 მაისს, საპატრიარქოს ხევის ხელოვნების სახლის ინიციატივით, თიბისი გალერეამ მოხევური თექისგან შექმნილი ნამუშევრების გამოფენას უმასპინძლა.

26 აპრილს თიბისი ბანკის ერთგული კლიენტებისათვის, თიბისი გალერეაში თეატრალური კვარტეტის მუსიკალური საღამო გაიმართა.

24 მარტს თიბისი ბანკმა ჯაზის მოყვარულებს არაჩვეულებრივი საჩუქარი გაუკეთა. ამჯერად, თიბისი გალერეის სტუმარი გახლდათ, საქართველოში ჯაზის ფუძემდებელი, ჯაზური მუსიკის ვირტუოზი შემსრულებელი თამაზ (თათუზა) ყურაშვილი და მისი ბენდი. ღონისძიებაზე ნაჩვენები იყო ცნობილი ქართველი მუსიკოსის მოღვაწეობის ამსახველი დოკუმენტური ფილმი ,,რითმი და ბგერა”.

17 თებერვალს თიბისი გალერეაში ბიძინა კვერნაძის სიმღერების ახალი კრებულისა და მისი უკანასკნელი ნაწარმოების _ ,,რეკვიემის’’ სანოტო კრებულის პრეზენტაცია გაიმართა. ღონისძიებაზე ცნობილმა ქართველმა მომღერლებმა კომპოზიტორის დაუვიწყარი სიმღერები შეასრულეს.

თიბისი გალერეამ ცნობილი ქართველი პიანისტის, ელისო ბოლქვაძის დაუვიწყარ საღამოს უმასპინძლა.   პიანისტი მსმენელის წინაშე 1 საათიანი საკოცენცერტო პროგრამით წარდგა და  ბეთჰოვენის, შოპენისა და პროკოფიევის ნაწარმოებები შეასრულა.